لەم رۆژانەدا چەند ڤیدیۆ و هەواڵێکم دیت و خوێندەوە سەبارەت بە تێکدانی باخچە و بێستان و مووچە و مەزرای خەڵکی لە چەند ناوچەیەکی باشوور، لەلایەن حکومەتەوە، بە بیانووی ئەوە کە بە ئاوی زێراب ئاودەدرێن.
لە راستیدا بەکارهێنانی ئاوی زێرابەکان کە بە ئاوی قاوەیی یا بۆر ناسراوە، بۆ ئاودێری دەبێتە هۆی زۆر نەخۆشی؛ و کارێکی باش نییە. بەڵام بەشێکی گرنگی ئەوە کە جووتیار و وەرزێرەکان پەنا بۆ ئەم ئاوە دەبەن، رەنگە نەبوونی ئاوی پاک بێ. کابرای وەرزێر کە ئاوی دەست نەکەوێ چی بکات؟ یا دەبێ واز لە پیشەکەی بێنێ، یا رێگایەک بدۆزێتەوە بۆ دەستەبەرکردنی ئاو.
رەنگە هۆکارێکی تریش ئەمە بێ کە جووتیار و وەرزێرەکانی کوردستان ئاستی ئاگایی و هۆشیارییان ئەوەندە نەبێ کە بیر لە ئاکامە زیانبارەکانی بەکارهێنانی ئەم ئاوە بۆرە بکەنەوە. رەنگە ئەوان تەنیا بیر لەوە بکەنەوە کە ئەم ئاوە هەم تینوێتیی رووەکەکەنیان دەشکێنێت و هەم تێچووی کوود و پەینی کیمیاییەکەیان بۆ دەگەڕێنێتەوە.
من پێم وایە حکومەتی هەرێم لەجیاتی تێکدانی ئەو باغ و بێستان و زەوییانە، هەوڵ بدات هۆشیاریی زیاتر بڵاوبکاتەوە و لە وۆرکشۆپ و بەرنامەی تایبەتدا رۆشنگەری و رێنومایی بداتە وەرزێرەکان و فێریان بکات چۆن ئەو ئاوە بەکاربێنن. پاککردنەوەی ئاوی زێراب کارێکی مەحاڵ نییە و زۆربەی جووتیاران دەتوانن گۆشەیەک لە زەوییەکانیان -ئ ەگەر لە ئاوەڕۆی زێرابەکانەوە نزیک بێ- بکەنە ئەستێری تایبەت بۆ پاککردنەوەی ئەو ئاوە؛ و دواتر ماددەی کلۆری تێبکەن و بۆ ئاودێری بەکار بێنن. هەرچەند ئاوەکە دەبێتە ئاوێکی قورس، بەڵام دیسان لە بێ ئاوی و لە ئاوی پیس باشترە.
No comments:
Post a Comment