هەمبانە، هەموو، هەمار

 

زۆر گەڕام.. هەمانەی کوردیم دەسنەکەوت

..هەمانە، هەموونە، هەمبانە، هەمبوونە، هەنبانە

بە هەگبەیەک یا شێوە هەگبەیەکی چەرمین دەگوترێت کە لە هەزاران ساڵ لەمەوبەرەوە مرۆڤ بۆ پاراستن و هەڵگرتنی کەلوپەل و پێداویستییە گرنگ. بایەخدارەکانی بەکاری هانیوە.  ئەم ووشەیە لە زمانی فارسیش بە چەند شێوەیەک دەردبڕدرێت؛ و لە هەمووان دیارتر (انبان)ە.   لە زمانی کوردیدا ئەم ووشەیە بە تەنیا ماوەتەوە و فرمانی نییە؛ لە فارسیدا فرمانەکەیشی هەیە کە بریتییە لە (انباشتن).

(ئەنباشتەن)ی فارسی واتە کەڵەکەکردن، کۆکردنەوە لەسەریەک، لەسەریەک تۆپەڵکردن..

بە بڕوای من ووشەی هەمبانە\ هەنبانە\انبانە لەگەڵ ووشەی هەموو\هەمە و (انبوه)ی فارسی یەک ریشەیە.  هەربۆیە کاتێک دەگوترێت هەمباشتە یا ئەنباشتە واتە هەموو یا هەموو لەسەریەک.  تەنانەت لەسەر ئەو باوەڕەم کە ووشەی هەمار\هەمبار؛ئەمبار\عەمبار\ئەنباریش هەر کوردییە؛ و لەگەڵ هەمبانە\هەنبانە یەک رەگ و ریشەن؛  ئەمە لە کاتی گەردانکردندا باشتر رووندەبێتەوە.  هەرچەند ئێمە بۆ ئەم  ووشەی (انباشتن)ە دانەماوین، بەڵام ئەگەر بەکاری بهێنین لە زۆر رەوش و دۆخ دا یارمەتیدەری باش دەبێت.   لەبەرئەوەی کوردی زمانێکی توانا و بەهێزە، بۆی دژوار نییە کە لە ناوی هەمبانە فرمان دروست بکات و گەردانی بکات.

 دەکرێت لە جیاتی ووشەی (store)ی ئینگلیسی و (خەزن)ی عەرەبی بەکار بهێنرێت.  میننەتی هیچ کەس ناخەینە سەر شانی خۆمان؛ ووشەکە هی خۆمانە و زمانەکەیشمان دەتوانێت وەک فرمان گەردانی بکات.

نموونەیەک لە بەکارهێنانی:

- بازرگانەکان کاڵا هاوردەکانیان بۆ چەند رۆژێک لە نزیک دەروازە سنووریەکان هەمباشتە دەکەن. 

- بازرگانەکان کاڵا هاوردەکانیان بۆ چەند رۆژێک لە نزیک دەروازە سنووریەکان دەهەمبێرن. 

لێرەدایە کە دەردەکەوێت (انبار) کوردییە.  لە کوردیدا فرمانی (داشتن)مان هەیە کە بۆ ئاودان بەکاردەهێنرێت.  لە دەمی ئایندە\داهاتوودا ناگوترێت (ئاو دەداشتم ) بە ڵکوو دەگوترێت (ئاو دەدێرم)، یانی گۆڕانێکی گەورە بەسەر ووشەکەدا دێت.  لە ووشەی  (هەمباشتن)یشدا بە هەمان شێوە بۆ ئایندە\داهاتوو لەسەر شێوازی (ئووداشتن) فرمانەکە گەردان دەکرێت.  ئەمەیش دەریدەخات کە ووشەی ئەنبار یا هەمبار واتە (هەمبێر)کراو یا بە فارسی (انباشتە)کراو.

- بازرگانەکان کاڵا هاوردەکانیان بۆ چەند رۆژێک لە نزیک دەروازە سنووریەکان هەمباشتووە.

- بازرگانەکان کاڵا هاوردەکانیان بۆ چەند رۆژێک لە نزیک دەروازە سنووریەکان هەمباشتبوو.

- بازرگانەکان کاڵا هاوردەکانیان بۆ چەند رۆژێک لە نزیک دەروازە سنووریەکان دەهەمباشت.

بازرگانەکان کاڵا هاوردەکانیان بۆ چەند رۆژێک لە نزیک دەروازە سنووریەکان بهەمباشتایە.

ئیبراهیم ئاغای دەرسیم

ئیبراهیم ئاغای دەرسیم، سەرۆک هۆز 

باوکی شەهیدی رێگەی نیشتمان، سەید رەزا

ئەم وێنەیە ساڵی ١٨٩٩ لە پەرتووکێک دا بە ناوی (خاچی سوور) لەلایەن پەرەستارێکەوە بە ناوی (کلارا بارتن) چاپکراوە.

گەرچەک

گەرچەک مێژوویەکی هەزاران ساڵەی لەگەڵ مرۆڤدا بەسەر بردووە و تا ناسران و دەرکەوتنی پەترۆڵ لە ژێر زەوی، گەرچەک، هەم رووناکی بوو، هەم گەرمی بوو هەم دەرمان و کەرەستەی ئارایشت.

هەرچەند ئێستا لەوانەیە لەسەدا پێنجی نڤشی کوردی ئەم سەردەمە رووەکی گەرچەکی نەدیتبێت و ناویشی نەبیستبێت، بەڵام ئەمە راستییەکی نکۆڵینەکراوە کە یەکەم شوێنزای گەرچەک ووڵاتی شام بووە؛ واتە شتێکی نامۆ نەبووە بەلای گەلانی رۆژهەڵاتی ناوینەوە. دەنکی گەرچەک لە گۆڕی میسرییە کۆنەکاندا دۆزراوەتەوە کە دەگەڕێتەوە بۆ ساڵانی ٤٠٠٠ پێش زایین.

نزیک بە هەموو شارستانیەت و ژیارەکانی جیهان وەک رۆمەکان و هیندییەکانیش گەرچەکیان ناسیوە و بەکاریان هێناوە.

گەرچەک لە ماوەی چەند چەند مانگێکدا لە دەنکە تۆوێکی بچووکەوە دەبێتە درەختێکی ئەستوور و بەرز، و کۆڵێک هێشووە تۆو بەرهەم دەهێنێت. لە بارودۆخی تەنگدەستی و نەبوونی سووتەمەنیدا گەرچەک رەنگە یەکێک لە باشترین فریادڕەسەکانی لادێنشینان بێت.

ئەوان بە روواندنی گەرچەک دەتوانن هەم رۆنەکەی و هەم پاشماوەکەی وەک سووتەمەنی بۆ زستان بەکار بهێنن. جگە لە رۆن ژەهری رایسینیشی تێدایە کە نرخ و بەهای خۆی هەیە و بازرگانیی پێوە دەکرێت. رایسین یەکێک لەو ژەهرە کوشندانەیە کە لە دروسکردنی چەکی کیمیاییدا بەکاردەهێنرێت.

موونەکە

ناوی ئینگلیسی:       Dodder

ناوی زانستی:      Cuscuta

ناوی  کوردی:  موونەکە، کالووسە، کاڵۆسە، تڕتڕە، رێزڕێزۆکە، زیرە، خێرک، خەیاتە، جلە، پیس پیسە، پیسک پیسکە، بێبنە، دارشکنە، ئەسپس، ئەڤێ، رەگەکیشە.

رووەکێکی مشەخۆرە، ریشەی نییە بەلکوو لەسەر رووەکی تر وەک تەماتە، پیاز، بیبار، وێنجە و هەندێک گوڵ و دار و دەوەن خۆی دەژیێنێت.  جۆرێک لوولەی هەیە دەینووسێنێت بە قەد یا ریشەی رووەکەکانەوە و خۆراکەکەیان بۆ خۆی رادەکێشێت.  لەشێوەی پەتێکی باریکە، رەنگی زەردە، گوڵ و گەڵا دەردەکات و تۆو دەکات و دوواتر تۆوەکانی دەڕوێنەوە.  وەک لە سەرەوە ئاماژەی بۆ کرا لە زمانی کوردیدا ناوی زۆرە، دیارە ئەم ناوانەی لێرە نووسراون کورمانجی و ئەردەڵانی و گۆران و لەکی و کەڵوڕی و کوردیی خوارنگ ناگرێتەوە؛ بەڵکوو بە زۆری ناوچەکانی موکریان و سۆران و بابان ئەم ووشانە بەکاردەهێنن.

مەبەست لە نووسینی ئەم چەند دێرەیش هەر ئەم خاڵە گرنگەیە.  بۆ ووشەیەک بزانە لەم زوانە توانایەی ئێمەدا چەندە واژەی جوان و بەهێزمان هەیە.  هەرچەند تا ئێستا نەمانتوانیوە وەک پێویست سوود لەم هەموو هاواتایە وەربگرین کە لە زمانەکەماندا هەیە بەڵام هیوادارم ئێستا واژەکان کۆبکرێنەوە و تۆمار بکرێن تا لە ئایندەدا نەوەکانمان بتوانن بۆ هەرکام لەم پەیڤانە جێگە و پێگەی شیاو بدۆزرێتەوە.

______________پێوانی بازنە یا لوولە

ئەو سەردەمە کە منداڵ بووم و لە قوتابخانە دەمخوێند، واتە ساڵانی هەشتاکانی زایینی، لە وانەی بیرکاری زۆر تەمبەڵ بووم.  ئێستایش هیچ لە بیرکاری و ژمارە و ئەندازە نازانم .  بەڵام هەندێک شتم دێتەوە بیر و ئێستا لە رووی زمانەوانییەوە لەگەڵ ووشە و چەمکە ئینگلسیییەکان بەراوردیان دەکەم؛ دەزانم لە رووی زمانەوە هەڵە بوون.  بۆ وێنە کە باس لە پێوانی شێوەیەکی لوولەکی یا بازنەیی دەکرێت.  تا ئەم ساڵانەی دوواییش هەر ئەو ووشانەم بەکاردەهێنا کە ئەوسا فێریان بوبووم. لێ ئێستا دەزانم هەڵە و چەوتی لە ووشەکاندا هەبوو.  لە پێوانی بازنە دا ووشەیەکیان بەکاردەهێنا بە ناوی (هەرێم). ئێستایش نازانم بە مانای (قطر)ی عەرەبییان بەکاردەهێنا نە بە مانای (محیط).  بەڵام هەر دووک ووشە عەرەبییەکە لە پێوانی بازنەدا بەکاردەهێنرێن.

رەنگە باشترین شت ئەمە بێت کە ووشەکان لە ئینگلیسیەوە بۆ کوردی مانا بکرێنەوە وەک ئەوەی لەم وێنەیەدا دەیبینین:

خۆت خاکی زەویوزارەکەت تاقی بکەرەوە

 

ئەم شێوازەی خوارەوە رێگایەکی باشە بۆئەوەی پێش چاندن و روواندنی بەرهەمەکانت دڵنیا بیت لەوە کە چ جۆرە خاکێکت هەیە.  هەمووی یەک یا دوو رۆژی پێویستە و ئاکام و ئەنجامەکەت دەست دەکەوێت.

ئەم تاقیکردنەوەیە پشکنینێک نییە بۆ زانینی چەندایەتی و چۆنایەتیی کانزاکان و ترشی و تفتی، بەڵکوو بۆ ئەوەیە ئەو خاکەی هەتە و نیازت هەیە کاری لەسەر بکەیت، بەر لە چاندن بیناسیت و ئەگەر پێویست بوو چاکی بکەیت.  بۆ ئەم مەبەستە ئەم هەنگاوانەی خوارەوە جێبەجێ بکە:

١- لە گۆشەیەکی زەوییەکەت چاڵێکی بچووک بە قووڵایی ١٦ سەنتیمەتر بکەنە.  ئینجا چەند مشتێک لە خاکەکەی لە قووڵاییەکەوە بهێنە دەرەوە.

٢- دەفرێکی شووشە، لەوانەی ساڵانی زوو بۆ ئاوەتەماتە بەکاردەهێنران، بهێنە و سێ یەکی پڕ بکە لە خاک.

٣- ئینجا تا سێ چارەکی شووشەکە پڕ بکە لە ئاو.

٤-  دەمی شووشەکە قایم ببەستە و بۆ ماوەی ٢-٣ خولەک بیشڵەقێنە.

٥- ماوەی ٢٤ تا ٤٨ هنگار لە شوێنێک دایبنێ و مەیجووڵێنە.

٦- دووای ئەو ماوەیە بە ئەسپایی شووشەکە لە شوێنێک دابنێ و بە ووردی لێی بروانە.

ئەو چینەی کە لە بنی شووشەکەدایە لە هەموو بەشەکانی تر قورسترە بریتییە لە لم.  چینی سەر لمەکە لیتەیە؛ واتە تێکەڵاوێکە لە گەردیلەی زۆر ووردی لم و قوڕ.  چینی  سەرووتر  بریتییە لە قوڕ؛ کە بە شێوەی سروشتی چەسپناکە و بەکاردەهێنرێت بۆ دروسکردنی خشت و دەفر و کەرەستەی گڵینە.

ئەو چینەیش کە دەکەوێتە سەر رووی ئاوەکەوە کۆمپۆستە.  واتە پێکهاتووە لە پارچە و گەردیلەی وورد و بچووکی دار و دەوەن و چیلکە و گەڵا و…

ئێستا تۆ بەگوێرەی ئەستووریی چینەکان دەتوانیت ئاکام و ئەنجامی خاکی زەوییەکەت بەدەست بهێنیت. بۆ وێنە: گریمان لمەکە کەمێک زیاتر لە نیوەی ئەستووریی هەموو خاکەکەی لە ئاوەکەدا پێکهێناوە، مانای ئەوەیە لە سەدا شەستی خاکەکەت لمە.  ئەگەر لیتەکەیش نیوەی لمەکەی پێکهێنابێت، کەواتە ئەویش  دەکاتە سەدا سی.  لە سەدا دە دەمێنێتەوە بۆ قوڕەکە. 

کەواتە زەوییەکەت لمی زۆرە و دووای ئاودان خێڕا هەڵدەچۆڕێت؛ و نم و شێی نابێت یا زۆر کەم دەبێت.  بۆ چاککردنی خاکی زەوییەکەت پێویستە چینێک کۆمپۆست بە سەر زەوییەکەتدا بڵاو بکەیتەوە.   چینە کۆمپۆستەکە گەرەکە لانیکەم پێنج سانتیمەتر ئەستوور بێت.  ئەم کۆمپۆستە ئاو لە خۆیدا هەڵدەگرێت؛ و ووردە ووردە  دەیداتە خاکەکە و ناهێڵێت زوو ووشک ببێتەوە.

پێویستە لایەنەکانی رۆژهەڵات لە دەوری یەکتری گردببنەوە