ئەم ووشەیە واتە سووڕدان، بادان. کەمتر لە نووسیندا بەکارهێنراوە؛ بەڵام واژەیەکی زۆر کۆنە. لە زمانی پاڵەویدا هەیە بەڵام فارسەکان نەیانزانیوە واتای چییە. جەڕ پاشگری (خ)ی وەرگرتووە و بووە بە (چەرخ). وەک دەزانین چەرخ بە واتای (تایە\تەگەر)، هەروەها بە بووە بە فرمان و واتای سووڕانی پێدراوە.
(چەرخی گەردوون) بە واتای (فەلەک) و ئاسمان و ئەستێرە و هەسارەکانی. هەروەها (چەرخ) بە واتای هەرشتێک لە شێوەی (خولخولە) یا (تایە) بێت و بسووڕێت؛ تەنانەت (چەخماخ یا فەندەک) کە بۆ داگیرساندنی ئاگر بەکاردەهێنرێت. لە کوردیدا زۆر واژەمان هەیە کە پاشگری (خ) وەردەگرن؛ وەک (گەن، گەنخ)، (بەر، بەرخ)، (توێ، توێخ) و تاد..
ووشەی (جەنجەڕ) کە کەرەستەیەکە جووتیاران بەکاریدەهێنن، بێگومان لە بنەڕەتدا (جەڕجەڕ) بووە و ئاڵوگۆڕی بەسەردا هاتووە. واتە شتێک کە دەسووڕێت.
لەلایەکی ترەوە ووشەی کۆشکەنجڕی و پەهلەوی هەیە کە ناوی ئامێرێکی جەنگیی سەردەمانی کۆنە؛ کە ئاشووریەکان بەکاریاندەهێنا بۆ وێڕانکردنی کۆشک و قەڵای دوژمنەکانیان. بەردی زل زلیان دەخستە نێو قایشەکەوە و ئاراستەی قەڵا و کۆشکەکانیان دەکرد تا هەنجڕ هەنجڕیان بکەن.
No comments:
Post a Comment